حل مشكلة شبكات الانترنت الغير رسمية فى مصر.. حل رسمى للعمل فى مصر

اهلا بيكم ياشباب

فى الفترة الاخيرة وبالتحديد الشهرين اللى فاتوا

موضوع محاربة شبكات الانترنت الغير شرعية فى مصر انتشر بشكل كبير جدا وملحوظ

كل وسائل الاعلام اتكلمت فيه وبدء يتنشر على الصحف والتلفزيون بشكل كبير جدا جدا جدا

طيب هانحط حلول سهلة باذن الله لكل المتضررين

ولغير المتضررين قبل مايحصل لاقدر الله اى حاجة

كله عارف ان ده مصدر دخل لشباب كتير اوى البلد مقدمتش ليهم اى فرصة عمل او مصدر دخل

وعلى فكرة خريجين كليات قمة وكليات محترمة جدا

لان الهدف كان فى بداية الموضوع هواية وليس تجارة

لكن للاسف تم التحول الفجائى خلال اخر سنتين

اصبحت تجارة مربحة جدا لتجار الاجهزة

والبلطجية اللى بيطلعوا ياخدوا مكان ويقولك بتاعى هاوزع فيه

واللى مش فاهمين فى اى حاجة ولا حتى فى تشغيل الكمبيوتر

عامة حال الشبكات مثل حال اى شغل جديد بينجح وكله يدخل فيه يبوظه

عاوز اوضح نقط معينة قبل الحديث عن الحلول

(1) مافيش مباحث اتصالات تيجى لك قبل اخطار من السنترال

يعنى كل اللى شوفتوه فى الفيديوهات من هجوم الشرطة على الابراج وفكها

لازم يكون جالك اخطار من سنترالك وبتمضى بعدم توزيع خط الانترنت بتاعك

(2)اخطار السنترال سببه انك جايب اكتر من 2 خط باسمك واكيد بتبقى باينة اوى

يعنى انت لو عاوز تقولهم تعالوا لى هات اكتر من 2 خط باسمك

اكيد من الواضح ان واحد جايب مثلا 4 خطوط باسمه بيعمل بيهم ايه؟..

يعنى معقول يكون مكالمته فيها 4 اجزاء على كل رقم؟..بالعقل يعنى

(3)الاجهزة اللاسلكية اعلى من 17 ديبى ممنوع مرورها من المطار

بقانون الاتصالات يمنع مرور الاجهزة دى من المطار

علشان كده الجهاز تمنه فى الحقيقة 400 جنيه وانت بتشتريه ب 850 جنيه

زى اى منتج تهريب بيدفع اجرة مشوار ورشاوى بالهبل وطبعا مكسب التاجر

(4)اخر حديث لرئيس جمهورية مصر العربية (السيسى)

فى الحديث ده وجه باوامر عليا ضرورة التحكم فى الانترنت ومايحدث فيه

على فكرة ياشباب فعلا بقى اخطر حاجة دلوقتى هو الانترنت ووسائل التواصل الاجتماعى

مش هاتسمعوا عن جواسيس تانى لان اميركا والدول الصهيونية نجحت فى ترويج وسائل التواصل

فاصبحت انت وهو وهى وكلنا بنعرف كل الدول دى توجهاتنا وافكارنا وحياتنا بالكامل من اول مابتصحى

لحد ماتنام بتعرفهم مناطق الضعف واسماء الظباط وتواجدهم وتسليحهم وافكارك انت شخصيا

نجحوا فى خلق جو تخيلى انت عايش فيه طول اليوم

مبتتصلش على اصحابك وبمبتقعدش مع اهلك كل بالفيس وتويتر وواتس اب

لكن اللى يهم الدولة الان هو الامن العام وهو اللى هايحصل علشانه كتير جدا جدا الفترة القادمة

(5)مستحيل مهنتنا تبقى رسمية فى يوم من الايام

ايوه مستحيل وهاقولك ليه....

دلوقتى حتى لو انت غلبان وعامل شبكة 6 افراد فقط..فال 6 افراد دول كلهم هويتهم هى الايبى بتاع روترك

يعنى كل تحركاتكم على الانترنت شخص واحد

يعنى لو حد منهم عمل مصيبة او عمل اثارة للشرطة هاتبقوا انتم فرد واحد

والى هايتأذى صاحب الروتر اللى جه باسمه الخط

علشان كده شركة الانترنت عملها رسمى ومرخص

هى بتدى 1 ايبى معروف لك يعنى كأنه هويتك او بطاقتك لوحدك

لكن انت هاتخلى ال 6 هويتهم واحدة وده امن دولة وش...

المهنة لو ينفع تبقى رسمية كنت اول واحد دخلت التليفزيون وطلبت مقابلة وزير الاتصالات

وكنت هاخد معايا شباب ونشرح له الوضع

بعد مافهمت وقريت وعرفت سياسة الدولة والقوانين كان لازم نوضح نقطة هامة جدا

عمرنا ماهنرخص ولا عمرنا هانقدر نبقى شبكات انترنت مستقلة بخط ولا اتنين ولا حتى 10

طب والحل.....

الحل اللى طبقته انا شخصيا ..اكلت السوق قبل ماياكلنى...

ازاى افهمك اانا

دلوقتى شركات الانترنت رسمية ومرخصة ..صح؟؟

طيب انا عامل شبكة 30 فرد....

جايب 3 خطوط انترنت 4 ميجا ب 900 جنيه

بحصل من كل فرد 25 جنيه يعنى دخل الشبكة 750 جنيه

طب خلينى حتى بحصل 1500 جنيه

بشترى روترات + سلوك انترنت + اعطال + جهد

هاتلاقى ان شبكة الانترنت لوحدها خسرانة

طب ياسيدى معاك كسبانة وبتكسب 1000 جنيه زيادة

انت معرض لخراب الشبكة ودفع غرامة لاتقل عن 10000 جنيه لو حصل لاقدر الله حاجة من الشرطة

طيب المكسب الحقيقى فين؟..

المكسب الحقيقى فى اكسسوار اجهزة الكمبيوتر لاغنى عنها (كيبورد-ماوس -بادة-سماعة-بلوتوث)

كل حاجة من دى اقل مكسب فيها 5 جنيه وممكن تجيب حاجات اعلى وانضف

المكسب الحقيقى فى نسخة الويندوز اللى لازم تتغير مرة كل شهر ودى تمنها من 15 جنيه الى 25 جنيه

دى بالذات فلوس صافية لك بدون اى مشاكل ولا عليك بره لحد كلها داخلة جيبك

المكسب الحقيقى فى اجهزة الموبايل الاندرويد وغيره المنتشرة واللاب والتاب

تعالو نحسب لو كل واحد من العملاء دول نزل نسخة + اشترى كى بورد

يبقى على الاقل تطلع منه ب 20 جنيه الشهر

طيب اكسب ازاى برضه؟..

هاتبقى انت وكيل شركة الانترنت فى منطقتك وهاتشتغل شرعى

يعنى هاتجيب له خط انترنت وتتعاقد له وتركبه وتمسك له صيانته وبرمجته

هاتجيب له اكسس بوينت جوه البيت وتكسب فى الاكسس حتى 5 جنيه و 10 جنيه برمجة

هاتدفع له فاتورة النت بتاعته وتاخد كوميشن على الاقل 10% يعنى لو جايب خط ب 90 جنيه

هتاخد 10 جنيه منه يبقى انت كده وصلت لاكتر من 40 جنيه من العميل

طب هاقولك على حاجة؟..

كل 2 هاتلهم خط انترنت شرعى وضاعف مكسبك منهم وانت شغال رسمى وشرعى لدى شركة الانترنت

طيب ايه رايك فى المكسب الصافى ده ومعليكش لحد حاجة وشغال شرعى؟..

اعمل محلك مكتب

اعمل سجل تجارى وبطاقة ضريبية مش هاتتكلف 400 جنيه على بعض

اعمل الشجل خدمات كمبيوتر

اشترى نسخة ويندوز اصلية وعلقها فى المحل ب 600 جنيه

انت كده رسمى مليار ال 100

المحل ده هانكتب عليه توكيل شركات الانترنت (تى داتا -فودافون-اتصالات-لينك)

انت مش هاتبقى وكيل رسمى لان الشركات مبترضاش

انت هاتبقى وكيل تحتى لان معايا بورتالات الشركات كل اللى عليك هاتقدم وخلال ايام العميل يستلم

فيه حساب بريدى ذهبى بيتم توريد اشتراكاتك فيه

وطبعا بيتخصم الكوميشن بتاعك

طيب حتى لو العميل عاوز يجيب من السنترال مباشر

مافيش مشكلة

العميل ده بطيخة لا هايعرف يبرمج ولا يركب ولا يعمل سبليتر ولا غيره

روح معاه خد مشوارك حتى لو 10 جنيه واستلم وركب له وخلي كل صيانته معاك

طبعا زيارتك وصيانتك وبرمجتك كل ده بفلوس

واهم حاجة لو عنده عطل من الشركة مالكش فيه

صدقونى ياشباب انا نفسى بدأت اشتغل على كده

وخلى شركات الانترنت بقى تسد فى هجوم الناس الشرعيين على الاستخدام العادل

وانت كده كده كسبان وافضل من الاول كتيييييييييييير

لان والله لو حسبتها الجرى وحرقة الدم وخسارة الاجهزة هاتلاقيك خسران مش ربحان

بس لازم تركز على الصيانة وتجميع الاجهزة والاكسسوار

بالنسبة لاجهزة الوايرليس بقى..

الشركات محاتجة جدا تغطية الكاميرات ونقل الانترنت والربط

وده هايبقى فيه ربح كبير جدا حاول تتعرف على الشركات دجى وتقدم خدماتك وخبراتك

فى ربط فروعها وتركيب الكاميرات وشركتنا معاك هتساعدك

هتبعت لك فنين معاينة وتركيب وطبعا لك كوميشن كويس جدا فى المشاريع دى

يعنى هابعت لك الاجهزة وفنى التركيب وهاتبقى انت القائد ولك الكوميشن بتاعك كمان

تبقى حاجة مهمة

انك بتواجدك على الانترنت تقدر تعمل لك دخل كويس جدا

عن طريق مدونة تكنولوجية او ترفيهية

شوف انت بتحب مجال ايه وتقدر تبدع فى ايه

هاتعمل منصة تدوين مجانية متكلفكش ولا جنيه

هاتشترك فى جوجل ادسنس

هاتتعب شوية اول 3 شهور

بعد كده هايطلع لك على الاقل 150 دولار ولا حتى 100 دولار بيعنى

كانه راتب لك وكانك بقيت موظف لك دخل ثابت من الانترنت

ودى هاركز فيها جدا اخليك خبير جدا فيها من الالف للياء

دى تصوراتى للوضع الحالى

اللى هايكمل معانا هو اللى هايقدر يوجد لنفسه فرصة عمل بجد

اللى مش هايقدر هو ده اللى داخل فاكر ان الدنيا كلها مكسب وهو اللى وقعنا فى الاساس

وبعون الله تعالى نعلن عن توافر التقديم الشرعى لكل شركات الانترنت

تى داتا - اتصالات - فودافون - لينك

والاشتراك من خلالى علشان الكوميشن يتقسم بينى وبينك وعلى فكرة

كل مانا زودت عدد مشتركين وانت زودت كل ماكان الكوميشن عالى والدخل كويس

وانا نفسى هاركز الان فى الصيانة والتجميع والاكسسوار والشروحات الاعلى

منتظر رايكم وافكاركم وانا معاكم بكل اللى هاتقولوه

يتبقى نقطة الناس اللى هاتقولك فيه ناس معندهاش اصلا خطوط ارضى علشان اجيب لهم

دول اللى هانعمل عليهم شبكة صغيرة على قدنا

بس هاتبقى عبارة عن انك تجيب مكان يبقى فيه خطوط انترنت

تاخد العميل ده ويروح يقدم على خط انترنت باسمه

تستلم الخدمة وتنقلها له بجهاز M5 روتر خاص لوحده

لو لقيت السنترال حاول يعمل معاك حاجة

خد العميل واطلع على اقرب قسم قدم بلاغ

وخلى العميل يتصل بالجهاز القومى للاتصالات 

يبلغهم انه مش قادر يوصل انترنت

لعدم توافر خطوط انترنت عنده

كتروا البلاغات دى علشان الدولة تتدخل

ساعتها هاسيسيبوك تشتغل ب M5

علشان تسد العجز ده

وانا اهو وانتو اهو ولو كان لى عمر هافكركم بالموضوع ده

صفحة المراسلة سيتم الرد خلال فترة اقصاها 24 ساعة


المراسلة
 
ارقامى معاكم لتنسيق المشروعات والتقديم

01009661565

01223043008

شاركه على جوجل بلس

عن Unknown